الخميس، 14 نوفمبر 2013

إلتهابات الأذن الوسطى

أم حماده : آه يا ودانى يا وجعانى يانى !!
حماده : what's wrong mom ?!
أم حماده : ولا ! أنا مش فايقالك دلوقتى ودانى بتنأح عليا و مش طايقة كلام
حماده : بتنأح!! كلامك قديم قوى يا نينه
خير سلامتك؟
أم حماده : ودانى بتوجعنى و بتنزل ميه و حاسة إن سمعى تقيل
حماده : دى ممكن تكون أعراض إلتهاب الأذن الوسطى
أم حماده : و دى عبارة عن إيه يا أبو العوريف؟
حماده : ده بيكون إلتهاب ورا طبلة الودن فى الأغلب نتيجة لميكروب بكتيرى أو فيروسى و الألم بينتج عن تراكم سوائل خلف طبلة الأذن
أم حماده : و ده إيه أسبابه يا حمودى ؟
حماده : عادة بيجى بعد أدوار البرد و الأنفلونزا
أدوار البرد دى بتسبب إلتهابات فى الأذن الوسطى و يبتدى يظهر الألم
أم حماده : و إيه العلاج فى الحالات دى يا أخويا
حماده : أولا تقليل الألم و ده ممكن بإستخدام كمادات دافية أو المسكنات أو بعض نقط الأذن المخصصة للحالات دى
أم حماده : طب و لو مفيش تحسن
حماده : تستشيرى دكتور و ممكن يكتبلك ساعتها مضاد حيوى مناسب للحالة
أم حماده : طيب و إزاى نتجنب الإصابة بالحالة دى
حماده : الحرص على تجنب نزلات البرد و التدخين السلبى كمان
أم حماده : إنت خريج كلية إيه يا ولا ؟
حماده : للمرة الألف ، أنا لسه طالب فى كلية صيدلة يا مامى
أم حماده : صيدلى الندامة

الخميس، 19 سبتمبر 2013

النقرس

أم حماده : آه يانا. آه يا صوبع رجلى الكبير يانا !!
حماده : مالك يا مامى  ؟ و ما معنى المصطلح "صوبع"
أم حماده : ولا! أنا مش فايقالك غور من وشى دلوقتى!
حماده : يا ماما أنا عايز أساعدك. سلامتك ! فى إيه؟
أم حماده : صوبع رجى الكبير مولع نار
حماده : سلامتك.
ياماما قولتلك خفى من اللحمة الضانى !!
أم حماده : واللحمة مالها يا ولا و مال صباعى؟
حماده : شوفى يا الحاجة غالبا اللى عندك ده من أعراض النقرس أو gout
أم حماده : ايه النقرس ده يا ولا؟
حماده : النقرس ده مرض بيسبب إحمرار و إلم فى المفاصل خاصةً فى صوباع الرجل الكبير أو "صوبع الرجل الكبير"
و العلاج سهل و التهاون فيه ممكن يأذى المفصل أكتر
أم حماده : و ده سببه إيه يا ولا ؟!
حماده : سببه uric acid
أم حماده : أسد إيه يا ولا ؟ إحنا فى جنينة حيوانات؟
حماده : اليورك أسيد ده ماده فى الجيم لما بتزيد فى الجسم بتكون حبيبات زى الرمل كده هى اللى بتسبب الألم
أم حماده : و ما هى عامل الخطورة لهذا المرض سيدى اللورد؟!
حماده : إنتى مالك قلبتى على شكسبير كده
عوامل الخطورة تشمل بعض الأمراض زى الضغط و السكر و الكوليسترول و تصلب الشريين . كل دى أمراض بتزود فرصة الإصابة بالنقرس
كذلك بعض أدوىة الضغط و الأسبرين اللى عامله تبلبعيه ليل نهار من غير ما تستشيرى الدكتور. كل ده ممكن يزود فرص الإصابة بالنقرس كذلك فى عامل وراثى و كمان نسبة الإصابة بتزيد فى الرجال عن النساء
أم حماده : و تنصحنى بإيه يا ولا يا دكتور حماده لحد ما الدكتور يشوفنى؟
حماده : خفى من أكل اللحمة شوية و إشربى ميه كتير و قللى وزنك
أم حماده : إنت فاكر نفسك دكتور يا لا !! ده انت حاياله صيدلى
حماده :  objection. I am a pharmacist. أنا صيدلى!!
أم حماده : صيدلى الندامة و الصدامة




الثلاثاء، 26 فبراير 2013

إرتفاع ضغط الدم


أم حماده : يا حماااااااادة. إنت يا ولا!

حماده : يا عيون حماده. شبيكى لبيكى حماده بين إيديكى

أم حماده : ناويلنى بورشامة الضغط من الشوفنيرة
حماده : بورشامة و شوفنيرة !!
الكلام ده إنقرض من زمان
أم حماده : بدل اللماضة فهمنى الضغط ده يطلع إيه
رسينى على الحوار.
حماده : حوار!!
بصى يا ستى؛ ضغط الدم ده شبه إيه؟
عارفة ماسورة الميه ؟
أم حماده : أيوه طبعا
حماده : لو الضغط زاد فيها ، هيحصل إيه ؟
أم حماده : هطرشأ
حماده : بغض النظر عن الألفاظ الغريبة إللى بتستعمليها، خلينا نقول إن ماسورة المية دى زى الشرايين فى جسمنا.
يعنى لو الضغط زاد فى شريينا ، هطرشأ هى كمان
أم حماده : يا لهوى!!
و الضغط ده مفروض يبقى كام عشان نقول إنه فى السليم؟
حماده : الضغط بيتقاس برقمين ؛ زى ما نقول مثلا إن ضغطك ١٢٠/٨٠
ده معناه إن أثناء إنقباض عضلة القلب الضغط بيكون ١٢٠
و أثناء إنبساط عضلة القلب الضغط بيكون ٨٠

  • الضغط الطبيعى بيكون أقل من ١٢٠/٨٠ فى معظم الوقت
  • الضغط العالى بيكون لما الضغط بيكون ١٤٠/٩٠ أو أكتر معظم الوقت
  • أما لما يبقى ١٢٠/٨٠ أو أكتر، بس أقل ١٤٠/٩٠ بنقول عليه إنه على وشك الدخول فى منطقة الضغط العالى
أم حماده : ع الحركرك يعنى
حماده : حاجة زى كده...المهم إن اللى ضغطه ع الحركرك إحتمال كبير يتحول لمريض ضغط
أم حماده : طب ليه الدكتور مصمم إن ضغطى يبقى أقل من الناس التانيه. خالتك فوزية مثلاً ضغطها ١٣٥/٨٥ و الدكتور قشطة ما بيعلقش ، أما أنا لازم ينزله أقل من ١٣٠/٨٠
حماده : عشان إنتى مريضة سكر .
السكر و أمراض القلب و مرضى الجلطات الدماغية لازم ضغطهم يقل عن الناس العادية
أم حماده : يا إخواتى عليه ! تقولش دكتور
حماده : يا ماما أنا فعلا دكتور صيدلى
أم حماده : صيدلى الندامة و الصدامة

الأربعاء، 26 ديسمبر 2012

علاجات البرد و الإنفلونزا

الأم : يا دَاكطور حمادة
حماده : يا ساتر يا رب .اللهم ما أجعله خير. دَاكطور. ايه البشاعة دى . شوهتوا الكلمة و المجال الصحى كله
أم حماده : إنت يا واد يا دَاكطور
حماده : خلاص يا ماما ، بلاش تقوليلى دكتور ، قوليلى أى حاجة ، قوليلى يا زكريا ، بس بلاش دَاكاتور دى عشان خاطرى
أم حماده : تعبانة يا ولا البرد مبهدلنى
حماده : سلامتك يا ستى اللى هاقولهولك ده هايريحك جداً
أم حماده : قول يا سبع البرمبه
حماده : علاج البرد محتاج راحة و شرب سوائل كتير
أم حماده : طب و الادوية يا فالح
حماده : أدوية البرد و الكحة بتقلل الأعراض بس ما بتقضيش على المرض
يعنى الكبار و الاطفال اعراضهم هتتحسن بس مش هتسرع الشفاء
و خدى بالك الادوية دى بتتصرف عادى فى الصيدليات للاطفال اللى تحت ست سنوات بالرغم ان ده لا يُفضل و بالتالى الكلام مع الطبيب واجب فى الحالات دى حتى و إن كان الدوا المستخدم مصرح به للاطفال . ده مهم جدا لان بعض الادوية دى ممكن تكون غير فعالة مع الطفل و تسبب له اعراض جانبية خطيرة
أم حماده : أحسن حاجة اضربلى بورشامتين مضاد حيوى؟ صح؟
حماده : بورشامتين ؟! أضربلى ؟!
ايه اللغات الحيه دى ؟!
لا مينفعش طبعاً، المضادات الحيوية مش مفروض تستخدم فى البرد العادى. لانها مش هتساعد بل على العكس ممكن تضر الحالة.
البلغم الأصفر أو الأخضر بيظهر مع البرد بعد كام يوم و مش مؤشر إن الواحد لازم يستخدم مضاد حيوى زى ما كتير فاهمين
لو البرد ما تحسنش بعد عشر ايام او إسبوعين ، هنا الدكتور ممكن يوصف مضاد حيوى
أم حماده : طب الأدوية الجديدة بتاعت البرد؟!
حماده : لو تقصدى مضادات الفيروسات الجديدة ، الأدوية دى ممكن تقلل الأعراض الخاصة بالأنفلونزا مش البرد العادى
أم حماده : طب شوربة الفراخ؟!
حماده : على فكرة بالرغم انى متأكد إنها جت معاكى كده ، بس فعلا شوربة الفراخ فيها تعتبر سوائل دافيه و الملح اللى فيها ممكن فعلا يساعد على العلاج و على فكرة من قرون و الشوربة بتستخدم للبرد
كمان فيتامين سى و الزنك
أم حماده : خش إطفى على الشوربة فى المطبخ
حماده : oh my god!!
أم حماده : هااااا!!؟
حماده : ولا حاجة ..بس افتكرى إنى صيدلى
أم حماده : صيدلى الندامة و الصدامة

الثلاثاء، 18 ديسمبر 2012

الأعراض

الأم :آه آه آه اتشوووووووووو
يقطع البرد و سنينه !!
أبو حماده : مالك يا ام حماده
ام حماده : سيبوني فى حالى
ده أنا لو مكنه كان زمانى صعبت عليكوا
شايفنى تعبانة و بردانه و برضه مفيش رحمة
آه آه آه اتشووووووووووو
أبو حماده : سلامتك يا ست الكل
حقك علينا
تاعبينك دايما
اخبار المحشى إيه ؟
ام حماده : واد يا حماده ....
حماده : يا فتاح يا عليم يا رزاق يا كريم
نعم، أفندم ......توءمرينى أمر
ام حماده : مش تشوف أمك تعبانه ليه ؟ و لا انت خلاص بعتنى؟
حماده : سلامتك يا ستى
هو أنا مش فهمتك انك بردانه؟ أكيد اختى بطه عدتك
بس أختك عيانه من يومين تلاته
حماده : بالزبط كده الشخص بياخد من يومين لتلاته بعد ما يتعرض للفيروس وفى بعض الحالات الفيروس بياخد أسبوع عشان تظهر الأعراض.
ام حماده : و الأعراض دى بتبقى إيه يالا
حماده : يالا ؟!!!!!!
ام حماده : قصدى يا دكتور . على رأى المثل "الحس عالى و الفراش خالى"
حماده : الأعراض معظمها بيكون بالأنف زى احتقان الانف ، سيلان الانف ، حرقان الزور و العطس
ام حماده : طب ليه أنا معنديش سخونيه زى اختك ؟
حماده : الكبار و الأطفال الكبار عادة مبيجلهومش سخونيه مع البرد أو سخونيه بسيطة ام الطفال الصغيرين زى بطة غالبا بيجلهم سخونيه مع البرد ما بين ٣٧.٧ و ٣٨.٨ .
كمان بعض الفيروسات بتسبب كحة، فقدان شهية،صداع،وجع عضلات، تنقيط بالأنف كذلك....
ام حماده : خش المطبخ و اطفى ع المحشى عشان تلاقوا حاجه تاكلوها
حماده : يعنى أنا عمال اشرحلك المرض و أنتى تقوليلى اطفى ع المحشى
I am a pharmacist
أنا صيدلى
ام حماده : صيدلى الندامة و الصدامة

الثلاثاء، 20 نوفمبر 2012

الأسباب و عوامل الخطورة

تررررن تررررن
الأم : الو
ميدو : أيوة يا طنط. ممكن أكلم حمادة؟
ام حماده : مين ؟ ميدو!!!!!
مش انت صاحبه اللي في كلية الطب؟
أيوة يا طنط
أم حمادة : مش كنت تنصحه يخش معاك بدل ما هو بايظ في كلية صيدلة
ميدو : متقوليش كده يا طنط .
ده دكتور صيدلى زي الفل
أم حمادة : صيدلى الندامة و الصادمة..... آه آه آه اتشووووووووووو
ميدو : سلامتك يا طنط
أم حمادة : الله يسلمك يا ميدو
اسكت ده البرد هيموتنى
ميدو : بعد الشر...
ممكن أكلم حماده بقى؟
ام حماده : سيبك من حماده و قوللى البرد ده بيجى ازاى ؟
ميدو : تعرفى يا طنط أن من الأسباب الأساسية لانتشار البرد هو الحضانات و المدارس و خاصة فى فصل الشتا
أم حمادة : على قولك يا خويا. البت بطة أخت حمادة كل يوم والتانى ترجعلنا بردانة من المدرسة و هات يا عطس و كحة
ميدو : مزبوط . أهى العدوى بتيجى من كده، فيروس يتنقل فى الرذاذ إللي بيخرج من بق الشخص اللى بيعطس أو يكح أو حتى بينفخه من منخيره.
أم حمادة : أخص عليكى يا بطة. بقى أنتى السبب فى اللى أنا فيه ده
ميدو : مش بس كده ..
ده كفاية أن الشخص يلمس عينيه أو منخيره أو بقه بعد ما يلمس حاجه ملوثة بالفيروس زى اكرة باب أو لعبة حتى!
بس على فكرة المريض بيكون معدى جداً اول يومين تلاته لكن بعد أسبوع بيبقى خلاص مش معدى
ممكن أكلم حمادة بقى؟
أم حمادة : لاهو أنا مقولتلكش
حمادة مش موجود
ميدو : you killed me slowly
ام حماده : و عليكم السلام و رحمة الله


الثلاثاء، 6 نوفمبر 2012

ضربة الشمس

الأم : واد يا حمادة
الإبن : واد !!!
حمادة !!
نعم يا ماما
الأم : إلحقني يا ولا أنا بموت
الإبن : بعد الشر يا ماما . مالك بس؟!
الأم : مش عارفة مالي!؟
أنا كنت بره بجيب عيش و كنت واققة في الطابور و الشمس كانت حامية وبعدين تعبت أوي و روحت
مش عارفة مالى يا ولا
هو إنت مش دكتور؟!
إعملي حاجة.
الإبن : سلامتك يا ماما متقلقيش شكلك أخدتي ضربة شمس
الأم : قطع إيده اللي يمد إيده عليا
هو حد يستجري يضربني . ده أنا كنت أكلته
الإبن : مقصدش يا ماما . أنا أفصد إن الأعراض دي إسمها ضربة شمس أو hyperthermia
الام : مش فاهمة حاجة يا ولا
عاملي فالح أوى فى الإنجليزي
كنت دخلت كلية طب بدل ما إنت فاقد في صيدلة
الإبن : mammy please stop it
الأم : إنت عايز تفرسنى !!!؟؟؟
الإبن : بصى يا ماما دلوقتي لاحظي الأعراض هتلاقي إنك مصدعة و جلدك أحمر وناشف و حرارتك عالية و ممكن تحسي إنك عايزة تتقيأي أو تحسي بمغص أو يجيلك إسهال . و يمكن يغم عليكى فى بعض الحالات.
الأم : إنت عرفت إزاي يا ولا ؟!  ده نفس اللي عندي
الإبن : didn't i told you
الأم : بطل تتكلم و قوللي أعمل إيه دلوقتى؟
الإبن : بسيطة خالص.
خدي دش بسيط و إرتاحي و عوضى السوائل اللي فقدتيها
و لما تنزلى تانى تجنبى الأماكن الحارة و أشعة الشمس و إلبسي ملابس فاتحة و خفيفة
الأم : طب و العيش أجيبه إزاى دلوقتى؟
أقولك إنزل هاته إنت بطل ما إنت بتذاكر ليل نهار
صيدلى الندامة و الصدامة